නව එන්නතකට අනුමැතිය ලබා දුන් එක්සත් ජනපදය..

අමෙරිකානුවන් දහස් ගණනකට සෑම වසරකම ජීවිතය අහිමි කරවන ශ්වසන රෝගයකට (RSV) එරෙහිව නව එන්නතක් එක්සත් ජනපද ආහාර හා ඖෂධ පරිපාලනය විසින් අනුමත කර ඇති බව විදෙස් මාධ්‍ය වාර්තා කළේ ය.

එය මහජනයාට ලබා දීමට පෙර එක්සත් ජනපදයේ රෝග පාලනය සහ වැළැක්වීමේ මධ්‍යස්ථානවලින් අනුමැතිය අවශ්‍ය වේ.

Arexvy ලෙස නම් කර ඇති මෙම එන්නත ඉදිරියේ දී බොහෝ ජීවිත බේරා ගන්නා ප්‍රධාන සාධකයක් වනු ඇති බව නිලධාරීන් පවසයි.

මෙම එන්නත නිෂ්පාදනයට වසර 60කට වැඩි කාලයක් ගතවී ඇති අතර RSV රෝගය වැළැක්වීම සඳහා වූ එන්නතකට අනුමැතිය ලබාගත් පළමු රට බවට අමෙරිකාව පත් වේ.

RSV යනු ශ්වසන රෝගයක් වන අතර එය සාමාන්‍යයෙන් වැඩිහිටියන්ට සීතල වැනි රෝග ලක්ෂණ ඇති කරන අතර කුඩා දරුවන්ට, වැඩිහිටියන්ට මෙන්ම වෙනත් සෞඛ්‍ය ගැටළු ඇති අයට අනතුරුදායක විය හැකි ය.

මේ අතර, දරුණු අවස්ථාවල දී, එය bronchiolitis තත්ත්වය ඇති කළ හැකි අතර පෙනහළුවල දැවිල්ල ඇතිවීම සහ හුස්ම ගැනීමේ අපහසුතාවන් ද සිදුවිය හැකි ය .

එමෙන්ම වියළි කැස්ස, උණ සහ සමහර විට හුස්ම ගැනීමේ ගැටළු දක්වාද මෙම රෝගය වර්ධනය විය හැකි ය.