ආහාර නියගයට කල් ඇතිව ඉතිරි කරමු.
මේ දවස්වල හැටියට නම් ආහාර නාස්තිය අවම කරගන්න පුළුවන් තරම් උත්සහ කරන්න ඕන. එහෙම කියලා අද කාලා ඉතිරි වෙච්ච දේවල් ෆ්‍රිජ් එකේ දාලා තියලා ආයේ හෙට කන්න ගන්න එක ගැන නම් නෙවෙයි මේ කියන්නේ. ඉස්සර අපේ ආචිචිලා සීයලා කාලේ ඉඳන් ආහාර ඉතිරි කළා වගේ කොහොමද අපි ආහාර ඉතිරි කරන්නේ කියන කරණය ගැනයි. ඒ දවස්වල අපි මේ ක්‍රමවේදයන්ට පයින් ගැසුවේ. ඒවා ගොඩේ ක්‍රම posh නැහැ කියලා. ඒත් අපි මේ ජීවත් වෙන්නේ ආහාර හිඟ කාලයක. කලින් ඉඳන්ම ආහාර ඉතිරි කළා නම් අද කන්න බොන්න නැති වෙන්නේ නැහැ නේද? හැබැයි අද ඉඳන් මේ වැඩේට අත ගැහුවොත් තව මාස කිහිපයකින් එන ආහාර නියගයට පුංචි හෝ සහනයක් ලැබෙයි.
මස් මාළු, අල, කොස්, දෙල් සහ දෙහි ආදී බොහෝ ආහාර වර්ග කල් තබා ගැනීමට ඉස්සර භාවිතා කළ එක් ක්‍රමවේදයක් තමයි අව්වේ වියළා ගැනීම. සමහර ආහාර තැම්බූ පසුව අව්වේ වේලා ගත් අතර සමහර ආහාර ඔවුන් තැම්බීමකින් තොරව අමුවෙන්ම වේලා ගත්තා. ඒ, සඳහා මඳ අව්ව සහ තද අව්ව භාවිතා කළා.
මස් මාළු වර්ග කල් තබා ගැනීම
- පිරිසිදු මැටි භාජනයකට මස් සියල්ලම දමා, මස් සියල්ලම වැසී යන පරිදි මී පැණි වත් කර බඳුනේ කට හුඹස් මැට්ටෙන් වසා සීල් කිරීම. මෙසේ කිරීමෙන් ඉස්සර මස් වර්ග බොහෝ කලක් නරක් නොවී තබා ගැනීමට හැකිවුණා. - සිහින්ව කපාගත් මස් සකසා ගත් මාළු රළු පෘෂ්ඨයක් මත අතුරා තද අව්වේ වේලා ගැනීම.
- දඩමස් සිහින්ව කපා තීරු කර ගෙන දුම් මැස්සක අතුරා එයට යටින් ගින්දර දමමින් දුම් ගැසීම.
- කපා ශුද්ධ කර ගත් මාළු කූරියන් ලුණු හා ගොරකා දියරෙන් පොඟවා කොළපතක ( පුවක් කොළයක ) ඔතා එයට දුම් වදින සේ ලිපට ඉහළින් ඇති දුමෙහි එල්ලීම.
- පිරිසිදු මැටි බඳුනක් ගෙන එහි අඩියට ලුණු සහ ගොරකා තට්ටුවක් දමා ඉන්පසු එය මත මාළු තට්ටුවක් අසුරනු ලැබූ අතර නැවත එය මත ලුණු සහ ගොරකා තට්ටුවක් දමා නැවත මාළු තට්ටුවක් එක් කරමින් මෙලෙස මාළු වර්ග කල්තබා ගැනුණා.
- (මාළු ඇඹුල් තියල්) මාළු පිරිසිදු කර කැබලි වලට කපා තම්බා අඹරා ගත් ගොරකා සමග සුදුළූණු, රම්පේ, කරපිංචා, ගම්මිරිස්, අමු ඉඟුරු, කුරුඳු පොතු සිහින්ව අඹරා මාළු මත හොඳින් තවරා ලුණුත් සමඟ මිශ්‍රකර කෙසෙල් කොළයක් අතුරා ගත් පිරිසිදු වලඳක අඩියට මෙම මිශ්‍රණය ද සමග මාළු කැබලි ඇතිරීමෙන් පසු මෙය ලිප මත තබා වලඳ උඩින් ගිණි කබලක් හා යටින් ගින්දර දමා පිස ගැනීම.
- (මාළු මෝජු) බල මාළු හෝ කෙළවල්ලා මාළු කැබලි ගැඹුරු තෙලේ බැදගෙන ඉන්පසු එයට බැදගත් අමුමිරිස් හා රතුළූණු සමග හොඳින් අඹරාගත් අමු ඉඟුරු, සුදුළූණු සහ අබ ස්වල්පයක් සමග මාළු, රතුළූණු, අමුමිරිස් කලවම් කර ලුණු විනාකිරි සමග මැටි බඳුන් වල බහාලීම.
ධාන්‍ය වර්ග, අල වර්ග හතු වර්ග, එළවලු වර්ග සහ පළතුරු වර්ග කල්තබා ගැනීම
- ලංකාවේ පොළොවේ පිදුරු හතු, ඌරු හතු, ඉබිටොක්කා හතු, හීන්වැලි හතු, වැලි හතු, රිට්ටා හතු, අදින හතු, ඉඳලෝලු හතු, කොටන් හතු අදී වශයෙන් බොහෝ හතු වර්ග හටගන්නවා. ඉතින් ඒවා ළමුව ලුණු වතුරේ තම්බාගෙන දිය මිරිකා හැර තද අව්වේ වේලා ගන්න. ඊට පස්සේ තමන්ට අවශ්‍ය වූ විටෙක ඇල් වතුරේ දමා යලිත් හතු පිපී ප්‍රකෘතිමත් වූ විට ආහාරයට ගන්න.
- ධාන්‍ය වර්ග හා අල, බතල, මඤ්ඤොක්කා ආදී අල වර්ග පෙති ගසා හෝ කැබලි කපා අව්වේ වේලාගෙන බෝතල් වල දාගෙන තියාගන්න පුළුවන්.ඊට පස්සේ කොටලා පිටි කරලා කෑම වර්ග හදාගන්නත් පුළුවන්. එහෙමත් නැත්නම් තෙලෙන් බැද පැණියෙන් දවටා අතුරුපසක් විදිහට හදාගන්නත් පුළුවන්.
- දෙල් ගෙඩි සිහින්ව ලියා තද අව්වේ වේලාගන්න. ඉන්පසු මෙම වේලා ගත් රට දෙල් කැබලි බැද එයට පැණි දමා රසවත් අතුරුපස ද, පොල් දමා වියළෙන්න මලවා මැල්ලුමක් හදාගන්නත් පුළුවනි.
- දෙහි ගෙඩිය හතරට පලා ලුණු දමා තද අව්වේ දින 07 ක් පමණ වියළා දෙහි යුෂ සහ ලුණු වතුර මිශ්‍ර කර අව්වේ කකාරවා ගෙන වියළි දෙහි වලට මිශ්‍ර කර බෝතල්වල අසුරා ගන්න.
- කොච්චි මිරිස්වලට ලුණු දමා තද අව්වේ දින 05 - 07 අතර කාලයක් වියළා දෙහි යුෂ සහ ලුණු වතුර අව්වේ කකාරවා කොච්චිවලට වත්කර බෝතල් වලට අසුරන්න.
- අච්චාරු දැමීම
- පළතුරු චට්නි දැමීම
