ඔහු පෙන්වා දෙන්නේ මෙවැනි තත්ත්වයන් හමුවේ අවසානයේදී පීඩාවට පත්වන්නේ සාමාන්‍ය ජනතාව බවයි.
පාර්ලිමේන්තුවේදී මන්ත්‍රීවරුන් පිරිසක් සමඟ පැවති සාකච්ඡාවකදී අදහස් දක්වමින් නාමල් රාජපක්ෂ මහතා මේ බව සඳහන් කළා.
ජීවන වියදම ඉහළ යාම හමුවේ ජනතාව දැඩි පීඩනයකට මුහුණ දී සිටින බවත්, ඉන්ධන මිල සම්බන්ධයෙන් යම් සහනයක් ලබාදුන්නද අනෙක් පාර්ශ්වයෙන් බදු වැඩි කිරීම හරහා එම සහනයේ ප්‍රතිඵල ජනතාවට නොලැබෙන බවත් ඔහු ප්‍රකාශ කළා.
ඉන්ධන මිල සම්බන්ධයෙන් අදහස් දක්වමින් ඔහු වැඩිදුරටත් කියා සිටියේ,
"නැවෙන් බාන ගාණට තමයි තෙල් දෙන්නම් කිව්වේ. කොමිස් ගහනවා කිව්වා. අඩුම ගාණේ තෙල්වල බද්දවත් අඩු කරන්න. තිබුණු බදු ප්‍රමාණයටත් වඩා තෙල්වලට බදු ප්‍රමාණය වැඩි කළා. අවසානයේදී පීඩනයට පත්වෙන්නේ ජනතාව."
මේ අතර කිරිපිටි සහ අත්‍යවශ්‍ය ආහාර ද්‍රව්‍යවල මිල ගණන් ද ඉහළ මට්ටමක පවතින බව පෙන්වා දුන් මන්ත්‍රීවරයා, භාණ්ඩ හා සේවා මිල ඉහළ යන වේගයට සමානුපාතිකව ජනතාවගේ වැටුප් වැඩි නොවන බවද සඳහන් කළා.
ගෑස් සහ ඉන්ධන පෝලිම් නොමැති බවට ආණ්ඩුවේ ඇතැම් මැති ඇමතිවරුන් ප්‍රකාශ කළද, ගම්මානවල සහ නගරවල ජනතාව සමඟ කතාබහ කිරීමේදී එම ගැටලු පිළිබඳව තවදුරටත් අදහස් පළවන බවද ඔහු කියා සිටියා.
එමෙන්ම ජනතාව මුහුණ දෙන ජීවන වියදම් ගැටලුවලට ආණ්ඩුව ලබාදීමට සූදානම් විසඳුම කුමක්දැයි ප්‍රශ්න කළ නාමල් රාජපක්ෂ මහතා, තවත් බදු පැනවීම හෝ විමර්ශන සිදුකිරීම පමණක් විසඳුමක් නොවන බවට චෝදනා කළා. ආණ්ඩුව විපක්ෂය මර්දනය කිරීමට උත්සාහ කරන බවටද චෝදනා කළ ඔහු, රටේ ආර්ථික ගැටලු සම්බන්ධයෙන් ජනතාවට සහන සැලසීමට වඩාත් ඵලදායී වැඩපිළිවෙළක් අවශ්‍ය බව අවධාරණය කළා.
තවදුරටත් අදහස් දැක්වූ නාමල් රාජපක්ෂ මහතා සඳහන් කළේ, පසුගිය වසර දෙකහමාරක කාලය තුළ ජනතාවගේ ජීවන වියදම පාලනය කිරීමට, පාසල් දරුවන්ගේ අධ්‍යාපන වියදම් අවම කිරීමට සහ ගෘහස්ථ ආර්ථිකය ශක්තිමත් කිරීමට ආණ්ඩුව සාර්ථක වැඩපිළිවෙළක් ක්‍රියාත්මක කර නොමැති බවයි. උද්ධමනය සියයට 8 ඉක්මවා ඇති බවටද ඔහු සඳහන් කළ අතර, එම තත්ත්වය මාසයෙන් මාසයට ඉහළ යන බවද ප්‍රකාශ කළා.
]]>අදට යෙදී ඇති දීපාවලී උත්සවය වෙනුවෙන් විශේෂ සුබපැතුම් පණිවුඩයක් නිකුත් කරමින් අග්‍රාමාත්‍යවරිය මේ බව සඳහන් කර තිබෙනවා.
දීපාවලී උත්සවය යනු සමාජය තුළ පවතින අන්‍යෝන්‍ය අවබෝධය, සංහිඳියාව සහ සහයෝගීතාව තවදුරටත් තහවුරු කරගැනීමට ලැබෙන මහඟු අවස්ථාවක් බවද ඇය සිය පණිවුඩයෙන් පෙන්වා දෙනවා.
එමෙන්ම විවිධ ජාතීන් හා ආගම්වලට අයත් ජනතාව අතර පවතින සංස්කෘතික සබඳතා ශක්තිමත් කරගනිමින් සාමකාමී සහ සහජීවනයෙන් පිරි රටක් ගොඩනැඟීමේ වැදගත්කමද අග්‍රාමාත්‍යවරිය අවධාරණය කර තිබෙනවා.
අග්‍රාමාත්‍ය ආචාර්ය හරිනි අමරසූරියගේ සම්පූර්ණ දීපාවලී සුබපැතුම් පණිවුඩය පහතින්.
අන්ධකාරය පරදා ආලෝකය උදා කරමින්, නපුරට එරෙහිව යහපත ලැබූ ජයග්‍රහණය සංකේතවත් කරන දීපාවලි උත්සවය, ආධ්‍යාත්මික ශුද්ධියෙන් පිරි මංගල්‍යයකි.
පහන් දැල්වීමෙන් නිවෙස් ආලෝකවත් වනවා සේම, අපගේ සිත් තුළ ඇති ද්වේෂය, ඊර්ෂ්‍යාව සහ අඥානකම නමැති අන්ධකාරය දුරු කරමින් ප්‍රඥාවේ හා කරුණාවේ පහන දැල්වීමට මෙම උතුම් දිනය අපට කදිම අවස්ථාවක් ලබා දෙයි.
ශ්රී ලංකාව වැනි බහුජාතික, බහුආගමික රටක දීපාවලී උත්සවය යනු අප අතර ඇති අන්‍යෝන්‍ය අවබෝධය, සංහිඳියාව සහ සහයෝගීතාව තවදුරටත් තහවුරු කරලීමට ලැබෙන මහඟු අවස්ථාවක් බව මම විශ්වාස කරමි.
විවිධත්වයෙන් අනූන අපගේ සංස්කෘතික බැඳීම් ශක්තිමත් කරමින්, ජාති, ආගම් භේදයකින් තොරව එකම මව්බිමක් ලෙස ඉදිරියට යාමට දීපාවලී උත්සව සමයේදී අප සැම අධිෂ්ඨාන කරගත යුතුය.
දීපාවලී දිනය ලක් වැසි ලෝවැසි සියළු හින්දු භක්තිකයින්ට සතුට, සාමය, සෞඛ්‍යය සහ සමෘද්ධිය පිරි දිනයක් වේවායි ප්‍රාර්ථනා කරමි!
]]>
හින්දු බැතිමතුන් මහත් භක්තියෙන් සමරන දීපාවලි උත්සවය වෙනුවෙන් විශේෂ සුබපැතුම් පණිවිඩයක් නිකුත් කරමින් ජනාධිපතිවරයා මේ බව සඳහන් කර තිබෙනවා.
සමාජීය, ආර්ථික සහ දේශපාලන යන සියලු ක්ෂේත්‍රයන්හි යහපත් පරිවර්තනයක් ඇති කරමින්, සියලු ආගමික හා සංස්කෘතික අනන්‍යතාවන්ට ගරු කරන රටක් ගොඩනැඟීම රජයේ ප්‍රධාන අරමුණක් බවද ජනාධිපතිවරයා අවධාරණය කරනවා.
එමෙන්ම සියලු පුරවැසියන්ට සමානාත්මතාවයෙන් සහ ගෞරවයෙන් සලකන සමාජයක් නිර්මාණය කිරීමේ මහඟු වගකීම වෙනුවෙන් රජය කැපවී කටයුතු කරන බවද ඔහු සිය සුබපැතුම් පණිවිඩයෙන් පෙන්වා දී තිබෙනවා.
දීපාවලි උත්සවය වෙනුවෙන් ජනාධිපතිවරයා නිකුත් කළ සම්පූර්ණ සුබපැතුම් පණිවිඩය පහතින්.
"අඳුර දුරලමින් ආලෝකය උදා කරන හින්දු ජනයාගේ උතුම් ආගමික උත්සවයක් වන දීපාවලි උත්සවය නිමිත්තෙන් මාගේ ශුභාශිංසන එක් කරන්නේ ඉමහත් සතුටිනි.
ක්‍රිෂ්ණා දෙවියන් නරගාසුරන් නමැති අසුරයා පරාජය කිරීම සිහිපත් කරමින්, අධර්මය පරදා ධර්මය ජය ගත් අයුරින් සියල්ලන්ගේ සිත්සතන්හි අඳුර දුරලා ආලෝකය පැතිරේවායි යන ප්‍රාර්ථනය පෙරදැරිව ලොව පුරා හින්දු බැතිමත්හු මෙදින ආගමික වතාවත්හි නිරත වෙති.
දීපාවලි සැමරුමේ සැබෑ අරුත වන්නේ හුදෙක් නිවෙස් පහන් ආලෝකයෙන් ඒකාලෝක කිරීමෙන් ඔබ්බට ගොස්, මිනිස් හදවත් තුළ ආදරය, කරුණාව, සහෝදරත්වය සහ මානවීය ගුණධර්මවල ආලෝකය දල්වාලීමයි. එහෙයින්, වෛරය වෙනුවට මෛත්‍රියත්, බෙදීම වෙනුවට සහජීවනයත්, අයුක්තිය වෙනුවට යුක්තියත් තෝරා ගනිමින්, වඩාත් යහපත්, සාධාරණ සහ සහකම්පනයෙන් පිරි සමාජයක් ගොඩනැඟීම සඳහා වන අපගේ අදිටන අලුත් කර ගැනීමට දීපාවලි උත්සවය අගනා අවස්ථාවක් සලසා දෙයි.
සමාජීය, ආර්ථික සහ දේශපාලන යන සියලු ක්ෂේත්‍ර තුළ යහපත් පරිවර්තනයක් ඇති කරමින්, සියලු ආගමික සහ සංස්කෘතික අනන්‍යතාවන්ට ගරු කරන, සියලු දෙනාට සමානාත්මතාවෙන් සහ ගෞරවයෙන් සලකන රටක් ගොඩනැඟීමේ මහඟු වගකීම වෙනුවෙන් අප මේ වන විට තිර අදිටනින් යුතුව කැපවී සිටිමු.
ආර්ථික සහ සමාජයීය වශයෙන් යළි ශක්තිමත් වෙමින්, ලෝකය හමුවේ ගෞරවාන්විතව නැඟී සිටින “සාමයේ සහ මනුෂ්‍යත්වයේ දිවයින” ලෙස ශ්රී ලංකාව ගොඩනැඟීම සඳහා අප එක්ව යන එම මාවත, මෙම දීපාවලියේ දැල්වෙන පහන් සිලෙන් තව තවත් ඒකාලෝක වේවායි ප්‍රාර්ථනා කරමි.
ශ්රී ලංකාවාසී මෙන්ම ලෝකවාසී සියලුම හින්දු බැතිමතුන්ට සාමය, සතුට, සෞභාග්‍යය පිරි සුබ දීපාවලි උත්සවයක් වේවායි හෘදයාංගම සුබපැතුම් එක් කරමි.”
]]>